KALIBO, Aklan—Presente eon nga nakakulong sa Malay Municipal Police Station ro daywang puganteng Koreano nga mabuhay eon nga nagapanago sa laye matapos maaresto it Bureau of Immigration sa magkaseparadong operasyon, Biyernes it gabi-i sa Isla it Boracay.
Suno kay P/Lt. Col. Don Dicksie de Dios, hepe it Malay PNP, nakilaea ro mga puganteng sanday Kwon Yong Tae, 59-anyos, nga naaresto sa Sitio Bolabog, Barangay Balabag ag Lim Seungil alyas IM Seung IL, 40-anyos nga naaresto man sa nasambit nga lugar.
Kaibahan man sigon nanda sa operasyon ro Korean National Police Agency.
Nasayuran nga expired eon ro pasaporte it daywang dumueuong nga nakataeanang igapa-deport bangud sa pagiging undesirable ag undocumented aliens.
Sanday Tae ag Seungil hay parehong wanted sa kasong fraud ukon pagpangloko.
Mag-eowas kara, si Seungil hay nagapangatubang pa sa kasong mob assault.
Dugang pa ni de Dios nga nagkaeain-eain eon nga negosyo ro ginsueod it daywa samtang nagapanago sa Boracay.
