KALIBO, Aklan—Mas pang ginpabaskog it Aklan Police Provincial Office (APPO) ro andang pagbantay ag pagpatrolya sa mga kabarangayan para masigurong nagasunod ro tanan sa minimum health protocols.
Raya hay sa tunga it pagpaidaeom sa probinsya it Aklan sa Modified Enhanced Community Quarantine (MECQ) hasta katapusan it Agosto.
Suno kay Police Lieutenant Colonel Bernard Ufano it APPO nga mag-eowas sa mga kapulisan nga naka-poste sa mga checkpoint, may pilang kabaro man sanda nga nagapatigayun it “recorrida” ukon pagpatrolya sa mga kabarangayan.
Engkaso nga may madakpan sigon sanda nga quarantine violators hay insigida nanda rayang gina-isyuhan it ticket para magbayad it multa.
Tuyo sigon kara nga maipaabot sa publiko ro importansya it pagsunod sa health and safety protocols kapareho it pagsuksok it face mask ag face shield, paghugas ukon pag-disinfect it alima ag pag-obserba it physical distancing agud nga makalikaw sa COVID-19 infection.
Dugang pa ni Ufano nga kung indi makontrol ro pagkalhit it virus mabahoe ro magiging epekto kara sa health system it nasyon kamana man nga posibleng magpundo ro ekonomiya.
