KALIBO, Aklan—Ginpatung-an eon it Office of the Mayor it banwa it Altavas ro owa pagka-ilintindihan nanday Odiong Punong Barangay Arnaldo Paloma, Kagawad Jocel Maximo ag tagreklamo nga si Genra Benedicto.
Suno kay Kapitan Palomo nga ginpatawag imaw ni Altavas Mayor Denny Refol agud nga ipaathag ro natabu.
Nauna kara, gin-insister it tagreklamo sa Bombo Radyo Kalibo nga si Genra Benedicto nga maeain ro andang buot matapos nga owa it ginhimo nga anuman nga aksyon ro andang opisyal nga ginpangayuan kara it bulig agud nga madaea sa ospital ro anang gumankon nga manug-unga.
Naghinyu sigon sanda it andang barangay patrol nga masakyan, apang ginpasa-pasahan imaw matapos nga owa sigon it available nga driver.
Apang kat madaea eon sa ospital ro andang pasyente hay nakita nanda ro patrol nga ginkargahan it semento paagto sa sangka fishing port sa tangke ni kapitan Paloma.
Ginpabutyag pa sigon ni kapitan nga pwedeng gamiton ro patrol it barangay sa personal nga pagkinahangean it mga opisyal.
Sa pihak nga parte, uman nga gindepensahan ni kapitan Paloma ro anang kaugalingon ag gin-insister nga owa man nag-agto kana ro pamilya benedicto agud nga magpangayo it bulig.
Maeawig sigon ro proseso makaron bangud nga kinahangean pa nga naka-PPE ro driver it mga nagadaea it pasyente sa ospital.
Samtang, naghugas man it alima si Kagawad Jocel Maximo nga imaw ro unang ginpangayuan it bulig it pamilya Benedicto.
Suno kana nga owa eon imaw nag-follow up bangud sa pagpati nga nag-agto ro pamilya kay kapitan Paloma.
