KALIBO, Aklan—Ginpaathag it pamunuan it Kalibo Municipal Police Station nga gin-abisuhan eon nanda ro mga traffic personnel nga dakpon ro mga motoristang maga-eabag sa batas-trapiko.
Raya hay kasunod it pagbuhos it mga saeakyan nga naga-adto ukon naga-byahe sa banwa it Kalibo umpisa nga ginpaidaeom ro probinsya it Aklan sa General Community Quarantine (GCQ) umpisa Setyembre 8.
Suno kay Police Major Jason Belciña, hepe it Kalibo Municipal Police Station nga gin-pull out eon ro pila sa andang kapulisan nga naka-deploy sa border control points.
Natueopangdan sigon nanda ro pagbug-at it daeagan it trapiko matapos nga haeugaan ro quarantine classification it probinsya kung siin gindugangan eon ro numero it mga pumueoyo nga pwedeng makasueod sa Kalibo.
Mag-eowas pa raya sa ginpahaba nga oras it operasyon it mga establisyemento komersyal ag pampublikong transportasyon.
Aminado si Major Belciña nga kueang ro andang traffic personnel para bantayan ro tanan nga nagapangunang daeanon sa Kalibo rason nga gin-cluster nana ro mga raya.
Mag-eowas sa traffic violations, problema man it mga otoridad ro mga naga-byaheng tricycle nga owa nagasunod sa tamang linya ag masami nga nagapatunga.
