KALIBO, Aklan—Ro newborn screening hay sangka simple apang importanteng pamaagi sa mga bag-ong tawo nga eapsag agud nga makit-an kung may unang sakit ukon anumang kondisyon nga kinahangeang mabueong.
Sa bulig kara, puweding maagapan ro pilang mga sakit nga nabobo-oe sa pag-unga ag maging ro kamatayon sa mga bag-ong tawo nga eapsag (neonatal death) nga sambilog sa napueong rason it kamatayon sa nasyon.
Suno kay Kate M. Meñez, registered nurse ag Prov’l Newborn Screening Program Coordinator it PHO-Aklan nga tuyo man kara nga mataw-an it normal nga pagpangabuhi ro mga bag-ong tawo nga eapsag ag maaabot ro kabilugang potensyal it unga.
Ro screening sa bag-ong tawo nga eapsag hay ginapatigayon 48 oras umpisa nga maiunga ro sangka eapsag, ukon sa sueod it 24 oras apang indi magtaliwan sa 3 adlaw.
Pagatuslokon sa sakong ro unga ag dikara magabo-oe it pilang patak it dugo.
Ro nabo- oe nga dugo hay igabutang sa sangka espesyal nga klase it card ag ginapamaea it apt-an nga oras.
Ro newborn screening hay puweding ubrahon it sangka nurse, doctor, komadrona, ukon medical technologist sa ospital ukon sa lugar kun sa siin nag-unga.
Engkasong magpositibo sa anumang kondisyon ro inisyal nga screening, puweding ipasa ro kaso sa mga doktor agud gilayon nga mataw-an it nagakaigo nga pagbueong.
