KALIBO, Aklan—Ginklaru it pamunuan it Kalibo Municipal Police Station nga ro andang ginpatuman nga oplan sita ag information operations ko nagtaliwan nga adlaw it Miyerkules hay nakatutuk sa pag-obliga sa mga nagabisikleta nga magsuksok it helmet ag magbutang it reflectorized sa andang mga bisikleta bilang warning device.
Suno kay P/Major Jason Belcenia, acting chief of police it Kalibo PNP nga raya hay sandig sigon sa new traffic code nga ginpatuman ko nagtaliwan nga dag-on.
Raya hay kabaliskaran sa pagpati nga ro operasyon hay angot sa pag-require sa mga bisikleta nga naga agi sa kalibo nga magbo-oe it bicycle permit ag sticker.
Nataeupangdan sigon nanda ro pag-inabu it mga nagabisikleta bangud sa limitadong transportasyon sa atubang it COVID-19 pandemic.
Gindugang pa ni Belcenia nga indi dapat nga balewalaon it mga nagabisikleta ro pagsuksok it helmet eabi pa ag mabahoe raya nga proteksyon kontra sa kahalitan sa ueo engkaso nga maeakot sa aksidente.
Eabi pa ag owa it may nakataeana nga bike lane sa mga siklista.
Ro ginpatigayon sigon nanda nga operasyon hay owa pa it eakot nga multa kundi nga pagpadumdum eamang sa pagsuksok it protective gear ag pagtau it edukasyon.
Apang pormal nga igapatuman sa masunod nga domingo ro bag-ong traffic code it kalibo kun sa siin eakip eon kara ro penalty nga 1,000 pesos.
Plano man nanda nga limpyuhan ro mga karsada kontra sa mga illegal parking.
