KALIBO, Aklan—Ginpadumdum it Comelec sa publiko nga eabag sa laye ro vote-buying ukon ro pagbakae it boto.
Raya hay kasunod sa pahayag ni vice president Leni Robredo angot sa pagbaton it kwarta sa vote buying apang dapat nga magboto gihapon nga sandig sa konsensiya.
Suno kay Crispin Raymund Gerardo, tagapaghambae it Comelec-Aklan nga indi dapat nga ilaygay sa mga botante ro vote buying bangud nga matsa nagapakita man raya nga ginabaton naton nga kaparte eon raya ukon kultura it mga Pilipino.
Kasunod kara, ginklaru it bise presidente ro anang ginhambae, kun sa siin , ginakundina sigon kara ro pagbakae it boto apang indi maitago nga matuod raya nga nagakatabu kada eleksyon.
Sa idaeum it Omnibus election code, kaeakip sa listahan it election offenses ro vote buying pati eon ro vote selling nga may penalidad nga pagka-presu it sang dag-on hasta an-um nga dag-on.
Sa pihak nga parte, gindugang pa ni Gerardo nga ginaeauman eon ro maabu nga mga pagbag-o sa igapaguwa nga bag-ong guidelines it komisyon sa pagpangampanya sa idaeum it new normal bangud sa paeag it covid 19.
Sa pihak kara, hueaton eon lang sigon ro pormal nga pagpaguwa it nasambit nga patakaran agud nga maplastar it husto sa publiko.
