KALIBO, Aklan—Gin-engganyo ni dating Kalibo Mayor ag Gubernatorial aspirant William Lachica si Sangguniang Panlalawigan member ag 1st District Congressional aspirant Atty. Harry Sucgang nga uman nga makipag-istorya kanda agud nga matuldukan eon ro andang owa pagka-ilintindihan.
Raya hay matapos nga nagapabilin ro kaeain it buot ni Atty. Sucgang sa dating kaalyado nga sanday Lachica ag SP member ag Vice Gubernatorial aspirant Atty. Nolly Sodusta sa gina-alegar nga pag-itsapwera kana.
Nasayuran nga ro daywa hay dungan nga na-interview it Bombohanay Bigtime kun sa siin uman nga ginsaysay ni Atty. Sucgang ro gina-alegar nga pagbalewala kana ag pagpabor kay Batan mayor Rodell Ramos nga imaw ro magiging opisyal nga kandidato it grupo sa pagka-kongresista.
Aminado man imaw nga nagkasugot sanda kato nga imaw hay magiging reserved candidate samtang owa pa it pinal nga desisyon si Ramos.
Apang matapos sigon nga ipresentar nga kandidato hay gulpi imaw nga gin-aywan kat last minute nga magdesisyon si Ramos.
Ro maeain pa sigon hay owa kana ginpahisayod ro desisyon nga makabig nga kawad-an it respeto.
Samtang, nagpanindugan si Lachica nga ginplastar nanda ro andang plano kay Atty. Sucgang, apang owa raya nag madinaeag-on.
