KALIBO, Aklan—Owa eon it kabuhi kat masapwan ro sangka mangunguma matapos raya nga gin-euok ag ginsueod sa sako sa Sitio Agbusay, Brgy. Agmailig, Libacao.
Nakilaea ro biktima nga si Edmond Arias, 43-anyos, residente it Brgy. Pinonoy sa nasambit nga banwa samtang ro suspek hay nakilaea kay Ricky Alegria, 21-anyos, residente it nasambit nga lugar.
Suno kay Police Master Sergeant Rolly Zubiaga it Libacao Municipal Police Station nga natabo ro insidente bandang alas-10:00 it gabi-i ko adlaw it Huwebes, Nobyembre 11.
Nagbulig pa sigon ro biktima sa pagpatay it baboy para sa kaadlawan it suspek.
Ginasugid nga parehong una sa idaeom it impluwensya it makahieilong nga ilimnon ro daywa kat magsub-eang sanda sa daean matapos nga mag-usoy it signal ro suspek, may limang kilometro ro distansya halin sa andang panimaeay.
Nakaangkon sigon sanda it diskusyon hasta nga na-impito eon ro suspek ag gin-euok ro biktima gamit ro anang bag.
Matapos ro insidente hay nag-uli sigon si Algeria sa andang panaegan ag nagbuoe it sako para isueod ro biktima antes raya ginhueog sa hubag.
Pagkataliwan sigon it daywang adlaw hay nag-aku ro suspek sa anang ama nga imaw ro nakapatay sa biktima kung siin boluntaryo raya nga nag-surrender sa panimaeay ni Libacao Mayor Charito Navarrosa.
Si Alegria hay presenteng una sa paghinakop it Libacao Municipal Police Station ag nakataeana nga iga-inquest sa adlaw it Lunes para sa nagakaigo nga disposisyon.
