KALIBO, Aklan—Uman nga nagpadumdom ro Local Government Unit ukon LGU-Kalibo sa mga benepisyaryo it pabaeay nga nahamtang sa Barangay Briones, Kalibo nga istaran eun ro andang mga unit agud nga indi raya pagbawion kanda.
Suno kay Engr. Marlou Villanueva, Municipal Planning and Development Coordinator nga andang igalistang disqualified beneficiaries ro mga indi sa gihapon mag-istar sa andang pabaeay.
Sandig sigon sa pagsinueondan nga dapat ro sangka benepisyaryo nga mag-istar sa anang unit ag daeayon eun nga aywanan ro andang dating panimaeay.
Ginklaro man kara nga raya hay sangka prebilihiyo rason nga may ginasunod sandang patakaran.
Sa makarun hay nakapadaea eun sigon sanda it sueat sa mga benipisyaryong owa pa gin-istaran ro andang baeay agud nga magpadumdom kanda angot sa andang obligasyon.
Pagakatapos it pitong adlaw nga mabatun eun nanda ro nasambitan nga sueat ag indi pa sa gihapon raya magsipot iga-disqualified eun.
