KALIBO, Aklan—Ginpahayag it Commission on Election nga ginapasugtan ro mga kandidato sa May 2022 elections nga magpatigayon it mga e-rallies ag live stream sa tiyempo it kampanya.
Sno kay Crispin Raymund Gerardo, tagapaghambae it Comelec-Aklan nga sandig sa Resolution No. 10730 ukon ro Rules and Regulations Implementing Republic Act 9006 ukon ro “Fair Elections Act”, nga ro mga magapadaeagan nga kandidato hay puweding magpatigayon it mga political meeting, rally ukon iba pang kapareho nga aktibidad online.
Dugang pa kara nga ro pagpatigayon it mga nasambitang aktibidad hay magapaidaeum sa mga masunod nga patakaran:
-Ro tanan nga mga rally hay dapat magpabutyag nga ginakilaea raya bilang sangka pampulitikang pagpueong ukon rally, nagakumpirma, pagsunod sa mga minimum health protocols, ag nagatao it ensaktong petsa, oras, ag impormasyon sa lokasyon.
-Para sa nasambitan nga katuyuan , ro sangka live stream sa mga platform it social media it kandidato hay dapat ikabig nga sangka political meeting ukon rally.
-Ro mga recording it e-rallies hay dapat igasumite sa Education and Information Department (EID) it Comelec sa sueod it 72 oras umpisa sa pag-ere kara.
-Puweding magbatun ro mga kandidato it mga in-platform nga regalo ag game currency apang owa raya ginapasugtan nga magtao it mga regalo sa mga live stream audience, ukon magpadaeagan it mga promosyon ag campaign nga magatao it mga in-platform nga regalo ukon game currency sa mga platform users ag live stream audience.
Ro “E-rally” hay nagatumod sa sangka rally sa idaeum it Artikulo X it Omnibus Election Code nga ginapatigayon para sa online nga mga pomoeuyo.
Ro terminong “election campaign” ukon “partisan political activity” hay nagatumod sa sangka hilikuton nga nagaduso sa eleksiyon ukon pagkapiyerdi it sangka partikular nga kandidato ukon mga kandidato sa sangka public office.
Dugang pa it Comelec nga ro live streaming it mga e-rallies hay igapatigayon kada gabi-e , umpisa sa Pebrero 8, 2022, sa mga opisyal nga social media channel it Comelec.
Ro tiyempo it kampanya para sa mga national post kapareho it presidente, bise presidente, senador, ag mga representante it party-list (PL) hay maga-umpisa sa Pebrero 8, 2022.
Raya hay magabuhay hasta Mayo 7, 2022./
Sa tiyempo it eleksyon , umpisa Enero 9, 2022 hasta Hunyo 8, 2022, ro EID hay magapaguwa it iskedyul it e-rally time slots.
Dapat may unang tatlong presidential ag tatlong vice presidential 10-minute slot kada gabi-e.
Magadugang man it limang senatorial three-minute slots; ag 10 PL nga three-minute slot, kada gabi-e.
Ro mga slot hay igataeana it random, base sa mga resulta it televised raffle it mga slot.
Ro raffle hay matabo sa Enero 8, 2022.
Ro mga e-rally live streams hay iga-post sa opisyal nga social media pages it Comelec.
Sa kada live stream, ro kandidato hay pagapasugtan nga makit-an ro mga live nga komento sa anang live stream.
Ro kandidato hay magreact ukon indi sa mga live nga komento.
Samtang ro tatlong pambansang debate para sa mga kandidato sa pagkapangueo hay igapatigayon man sa sueod it tatlong adlaw.
Ginpahayag it Comelec nga ro unang debate hay igapatigayon sa una ag ikaywang dominggo it campaign period para sa sangka national post, ro pangaywang debate hay igapatigayon sa ikalima ag ika an-om nga dominggo it campaign period para sa national post ag ro ulihing debate hay igataeana sa sueod it ika-10 ag ika-11 nga dominggo it tiyempo it kampanya para sa national post.
Ro poll body hay dapat magpahayag it mga pagsinoeundan ag regulasyon para sa pagpatigayon it mga debate.
