KALIBO, Aklan–Dead on arrival sa Aklan Provincial Hospital ro sangka 21-anyos nga motorista matapos nga araduhon it sangka elf aluminum van sa national highway nga sakop it Brgy. Feliciano, Balete.
Nakilaea ro biktima nga si John Peter De Juan, residente it nasambit nga lugar.
Base sa inisyal nga imbestigasyon, pagguwa halin sa interior barangay ro biktima kat gulpi eamang imaw araduhon it paabot nga elf aluminum van nga ginamaneho ni Jonard David, 27-anyos, residente it Brgy. Catabana, Madalag kung siin may sakay raya nga tatlong pasahero.
Ginasugid nga halin sa direksyon it banwa it Balete ro van ag pauli eon kunta sa Kalibo kat matabo ro aksidente.
Posibleng owa mapan-uhan ni David ro pagtabok it biktima rason nga raya hay nasunggaban.
Sa makaron, nagapadayun pa ro imbestigasyon it Balete Municipal Police Station para sa nagakaigo nga disposisyon.
