KALIBO, Aklan—Nagtapos eamang sa Top 5 ro karera it pambato it Pilipinas nga si Beatrice Luigi Gomez sa ginpatigayon nga Miss Universe 2021 sa Eilat, Israel.
Samtang ginkoronahan man bilang Miss Universe 2021 ro pambato it nasyong India nga si Harnaaz Sandu.
Kaibahan man sa Top 3 Semi-Finalist it nasambitan nga beauty pageant ro pambato it Paraguay nga si Nadia Fierrera ag si Lalena Mswane it South Africa.
Apisar nga napasaeawan si Gomez nga maiuli ro korona hay naging mainit man ro suporta nga ginpakita it mga Pinoy mas kapin eun ro mga nagbakae pa it ticket agud nga makapamantaw it live.
Suno kay Bombo International Correspondent Melly Jean Novilla it Israel nga eubos gid ro excitement it mga Pinoy fans sa pag-mpisa pa eamang it event bangud nga ro pambato it Pilipinas nga si Beatrice Luigi Gomez hay kaibahan eagi sa “hot picks” it Missosology.
Nauna kara, ginpahayag it 26-year-old Cebuana beauty nga anang pagahimuon ro anang masarangan apang owa raya ngapromisa nga anang maiuli ro pang-limang Miss Universe crown para sa Pilipinas.
Dugang pa kara nga mga mayad ag gwapa ro anang mga kaibahan.
