KALIBO, Aklan—Nagtau si Madam Elsa Macoy, sangka kilaeang psychic sa aklan it pilang “swerte” tips para sa pagsug-aeaw hinduna sa Bag-ong Dag-on.
Una kara hay ro pagpahaum it 12 nga nagkaeain-eain nga prutas sa lamesa.
Kinahangean suno kana nga magsuksok it green, yellow ukon blue violet nga eambong sa Disyembre 31 hasta Enero 1, 2022 para sigon maka-attract it suwerte eabi eon sa kwarta.
Apang mas mayad suno kana ro pagsuksok it yellow sa sueod it baeay ag sa opisina.
Mag-eowas kara, mayad man suno kana nga maghanda it pasta kapareho it spaghetti, sotanghon, bihon ag iba pang mga putahe.
Sambilog pa sa pampaswerte nga pwedeng obrahon hay ro general cleaning sa kada kanto it baeay ag ipilak ro mga luma ag samad nga gamit ag iba pang gamo agud nga magsueod ro good fortune energy.
Mag-display it tiger sa tunga it baeay ukon sa sala.
Dugang pa ni Madam Elsa nga sa 2022 hay maabu ro mga magapakasae ag makaangkon it masadya nga lovelife.
Para man sa mga napas-eawan sa patag it paghigugma, kinahangean suno kana nga kalipatan eon ro ex ag mag-move on.
Mas focus man ro mga tawo sa career kun sa siin ro mga naduea-an it trabaho ko pandemya hay magabalik ukon maka-usoy it panibag-ong trabaho.
Amat-amat man sigon nga mabawi ro mga negosyo sa aklan partikular sa isla it Boracay.
Patok man sigon nga negosyo makaron ro restaurant, bar, mga concrete materials, gadget ag online business.’
