KALIBO, Aklan—Padayun pang gina-imbestigahan it Numancia Municipal Police Station ro sangka insidente kung siin sangkiri nga mabiktima it stray bullet ro pamilya Vargas kasunod it pagsug-aeaw sa bag-ong dag-on sa bahin it Brgy. Laguinbanua East, Numancia.
Raya hay matapos nga bumanda ro nagtaeang nga bala it kalibre 32 nga baril sa screen door it pwertahan sa kusina it baeay nanday Mrs. Herbeth Antonino Vargas.
Suno kay Police Corporal Arjorine Mendoza it Numancia Municipal Police Station, insigida sanda nga nagresponde sa nasambit nga lugar matapos masayuran ro Facebook post ni Herwin Antonino nga igmanghod it tagbaeay.
Nakipag-coordinate sigon sanda kay Punong Barangay Lalaine Tan para ma-verify ro natungdan nga social media post.
Sa pag-usisa it mga otoridad, may nakita sanda nga basiyo it kalibre 32 nga baril haeos 60 metro ro kaeayuon sa baeay it pamilya Vargas.
Nakataeana nga i-sumite it Numancia PNP ro na-rekober nga bala sa Scene of the Crime Operatives (SOCO) sa pag-eaum nga ma-trace kung sin-o ro tag-ana it baril.
Sa inisyal nga pag-usisa, tadlong ro daeagan it bala halin sa gunman ag owa naghalin sa ibabaw.
Tumama pa sigon ro bala sa sangka puno it saging antes nga umigo sa screen door.
Sa pihak kara, mabahoe ro naging pagpasaeamat ni Mrs. Vargas bangud nga owa it may tinamaan it nagtaeang nga bala.
Nasayuran nga ap-at eamang sanda nga naga-istar it anang mga unga sa andang baeay.
