KALIBO, Aklan—Magapangatubang sa kasong pageabag sa Batas Pambansa numero 881 ukon Comelec gun ban ro sangka eaeaki matapos nga madakpan it illegal nga armas sa Brgy. Tina, Makato.
Ginkilaea ro suspek nga si Harry Taborda, sa legal nga edad ag residente it nasambit nga lugar.
Base sa impormasyon maghalin kay PSSgt. Nederden Patani it Makato PNP, nagpangayo it police assistance ro punong barangay it mismong lugar kon siin may nakit-an nga sangka eaeaki nga makadueoda ro anang hueag sa mismong likod it andang panimaeay.
Angot kara, insigidang nagresponde ro pulisya kon siin nadakpan si Taborda ag nabueo sa anang posisyon ag kontrol ro sangka improvised 12 gauge shotgun ukon pugakhang.
Bangud kara, insigida imaw nga gindaea sa nasambit nga taeatapan it pulisya kon siin imaw sa makaron nakakulong para sa nagakaigong disposisyon.
Nasayuran nga umpisa makaron nga adlaw it Dominggo, Enero 9 hay nag-arangkada eon man ro mga comelec checkpoints sa bilog nga probinsya it Aklan.
