KALIBO, Aklan—Patay ro sangka 62-anyos nga eaeaki matapos nga ginbaril it owa pa makilaeang gunman samtang nagapanikangon paadto it simbahan kaina it agahon sa Brgy. Rosario, Malinao.
Nakilaea ro biktima nga si Nonito Salvador Nam-ay, residente it Sitio Fatima, Brgy. Bulabod sa nasambit nga banwa.
Base sa inisyal nga imbestigasyon it Malinao Municipal Police Station, samtang nagapanikangon paadto it simbahan ro biktima hay gulpi eamang nga may nagpaeapit kana nga persona ag insigida nga nagpaeupok it baril.
Nakaangkon it lastro sa batiis ag waea nga dughan ro biktima nga naging rason it anang hinali nga kamatayon.
Gilayon pa raya nga gindaea sa ospital apang gindeklara nga dead on the spot.
Sa makaron hay nagapadayun pa ro imbestigasyon it Malinao PNP para matumod ro motibo sa krimen kamana man nga madakpan ro may kahimuan kara sa nasambit nga biktima.
