KALIBO, Aklan—Nagapanawagan makarun it hustisya ro pamilya it sangka 62-anyos nga ama nga ginbaril-patay it owa pa makilaeang gunman samtang nagapanikangon paadto it simbahan kahapon it agahon sa Brgy. Rosario, Malinao.
Ro biktima hay ginkilaea kay Nonito Salvador Nam-ay ag residente it Sitio Fatima, Brgy. Bulabod sa banwa it Malinao.
Suno sa unga it biktima nga si Nomelyn Nam-ay nga mabahoe ro pagpati it andang pamilya nga bangud sa pagka dimiss it ginapasaka nga kasong murder sa anang ama ro naging rason it suspek sa pagbaril-patay kara.
Madumduman nga sambilog ro biktima sa mga ginaturo nga suspek sa pagpatay kay Lauro Fernando matapos nga magtindog sigon nga saksi sa krimen si Marlon Dioso.
Sa pihak kara, nagapati ro pamilya ni Nonito nga owa it kahilabtanan ro andang ama sa krimen mas kapin pa nga nagdesisyon eun ro piskal angot kara.
Apang eubos nandang ginakasubo nga gulpi eamang nga ginbaril ro andang ama ag nakaangkon it maabong tama sa kaeawasan nga naging rason it anang hinali nga kamatayon.
Gilayon pa nga gindaea sa ospital ro biktima apang gindeklara nga dead on arrival.
Sa makaron hay nagapadayun pa ro imbestigasyon it Malinao PNP sa nasambitan nga insidente.
Sa pihak nga parte ginpahayag man ni Barangay Kapitan Rosario Dela Cruz nga mag-euwas sa gina-imbolbaran nga kaso ni Nonito Nam-ay angot sa pagkamatay ni Lauro Fernando hay owa eun raya it ibang record sa andang barangay.
Ginpahayag pa kara nga si Nonito hay sangka mahugod ag maboot nga klase it tawo.
