KALIBO, Aklan—Nagapadayun ro kampanya it Highway Patrol Group (HPG)-Aklan kaibahan ro Land Transportation Office ag iba pang law enforcement agency sa pagpatigayun it checkpoint sa mga national highway it probinsya.
Tuyo kara nga masiguro ro maayos nga daeagan it trapiko kamana man nga masikyar ro daea nga dokumento it mga motorista.
Suno kay PSSgt. Hitler Villanueva it HPG-Aklan nga kaeabanan sa andang ginatan-aw hay ro helmet, lisensya, OR-CR ag safety gear it mga saeakyan.
Ginklaro man kara nga plain view eamang ro andang ginapatigayun.
Mag-eowas sa implementasyon it Republic Act (RA) 4136 kaibahan ro LTO hay nagapadayun man ro monitoring it HPG sa mga insidente it carnapping ukon motornapping.
Ginpabugae pa kara nga naging madinaeag-on ro andang ginkasa nga operasyon ko Disyembre 20, 2021 matapos nga maaresto ro suspek sa motornapping sa banwa it Libacao.
Nakataeana eon sigon nanda raya nga pasakaan it kaso matapos nga mahueog sa regular filing.
