KALIBO, Aklan—Uman nga nagpaandam ro Commission on Elections ukon Comelec nga likawan ro pagbitbit it armas ag iba pang mataeum nga hinganiban kadungan it pagpatuman it gun ban matapos nga opisyal eon nga nag-umpisa ro election period para sa 2022 elections.
Suno kay Atty. Roberto Salazar, Provincial Comelec Supervisor nga indi eon mangawa sa mga checkpoint sa pilang mga banwa kabulig ro Philippine National Police ag Armed Forces of the Philippines nga nagatuyo nga hugut nga mapatuman ro gun ban nga magabuhay hasta sa Hunyo 8.
Ginpaathag ni Atty. Salazar nga sandig sa resolution 10728 it poll body, ginabawae ro pagdaea it unauthorized firearms, deadly weapons ag mga bodyguards sa guwa it baeay ag sa tanan nga pampublikong lugar.
Ro mga katapo eamang it PNP, AFP, Philippine Coast Guard ag mga miyembro it iba pang Law Enforcement Agencies ro exempted sa gun ban, basta nga may authorization halin sa COMELEC.
Buot hambaeon suno kana nga ro tanan nga mga License to own firearms outside the residence hay kanselado.Samtang, ginpaathag it Comelec nga samtang owa pa it campaign period hay bukon pa it sakop it andang laye ro mga aspirante nga nagapatiagyon it early campaigning.
Ro kampanya para sa national candidates hay maga-umpisa sa Pebrero 8 samtang sa local candidates hay sa Marso 25.
