KALIBO, Aklan—Gintalakay sa ginpatigayun nga session it Sangguniang Panlalawigan it Aklan ro pagpasa it sangka resolution nga naga-engganyo sa mga lokal nga gobyerno it probinsya nga magpasa it ordinansa nga naga-suporta sa “no vaccine, no ride policy” it Department of Transportation (DOTr).
Nagpanindugan si Aklan 1st District Board member Nemesio Neron nga kinahang-ean nga mapungkuan it mas temprano ro nasambit nga butang bangud eubos rayang ginakinahang-ean makaron nga tyempo eabi pa ag una eon sa idaeom it Alert Level 3 ro probinsya.
Nagpaabot man it andang kaugalingon nga opinion ro iba pang miyembro it Sangguniang Panlalawigan ag gin-insister nga masyado rayang sensitibo kamana man nga kinahang-ean ikonsidera ro kinamatarong it kada pumueoyo.
Bangud kara, ginpakamayad eon lang nga i-refer raya sa mga subject committee partikular sa Committee on Laws, Committee on Health ag Committee on Transportation.
Nauna eon nga ginpatuman ro “no vaccine, no ride policy” sa National Capitol Region matapos rayang ipaidaeom sa Alert Level 3 hasta sa katapusan it Enero.
Tuyo eamang kara nga limitahan ro hueag it mga unvaccinated indibidwal ag masiguro ro kaeuwasan it tanan sa tunga it nagatinaas nga kaso it COVID-19 infection.
Sa pihak nga parte, ginkasugtanan it mga miyembro it Sangguniang Panlalawigan nga magkriar it Special Investigating Committee para talakayon ro ginpasaka nga kaso ni Madalag Vice Mayor Rex Gubatina kontra sa anang igkampod nga si Madalag Mayor Alfonso Gubatina.
Raya hay matapos nga ginpasakaan it bise alkalde it kasong administratibo partikular ro dishonesty and misconduct from the office si Mayor Gubatina.
Ro nasambit nga kaso hay nakataeana pa nga pagatalakayon it natungdan nga komitiba.
Matueopangdan nga maga-engkwentro sa pagka-alkalde it Madalag ro mag-igkampod sa 2022 national and local elections.
