KALIBO, Aklan—Owa pa it klaru nga motibo nga nakikita ro mga otoridad angot sa pagbaril-patay sa dating detainee it aklan rehabilitation center nga si George Quindong, 31 anyos ag residente it Sitio Maeobog, Brgy. Calizo, Balete.
Suno kay Jovina Nerviol, magueang it biktima, sa makaron hay nagapadayun pa ro imbestigasyon it Balete Municipal Police Station.
Ginatutukan sigon nanda ro tanan nga anggulo nga posibleng motibo sa pagpatay sa biktima.
Sa pagpangusisa it Balete PNP, natukiban nga umpisa sa pagguwa it ARC it anang manghud kaibahan ro andang 66 anyos nga ina nga si visitacion hasta nga naka-uli sanda sa balete hay ginsundan eon sanda it mga suspek.
Si Quindong hay makapilang beses nga ginbaril it riding-in-tandem criminals huwebes it hapon samtang nagabaktas pauli sa andang baeay.
Nag-angkon imaw it tama it bala sa nagkaeain-eain nga parte it anang eawas nga naging rason it anang insigidang pagkamatay.
May narekober man nga basiwo it bala it kalibre 45 ro mga otoridad sa crime scene.
Angot kara, ginhinyu ni Nerviol ro bulig it sin-o man nga nakasaksi sa pagpamaril sa anang manghud nga makipagbueuligan sa mga otoridad para sa pagtumod sa identity it mga suspek.
Gin-engganyo man nana ro posibleng nakasaksi sa krimen nga makipag-angot kanda ukon sa kapulisan agud nga maboe-an it panaysayon.
Nasayuran nga si quindong hay kamanghuran sa pitong magmaeanghud.
Ro anang eawas hay nahamyang sa baeay it anang magueang nga si Jovita sa Barangay Aranas, Balete.
