KALIBO, Aklan—Una sa ika ap-at nga listahan it mga nailistang kaso it kanser sa Pilipinas ro liver cancer ukon kanser sa atay.
Base sa datos ko dag-on 2020, kapin sa 9,600 ka mga pasyente ro binawian gid it andang hueam nga kabuhi sa kapin sa 10,600 nga mga nailistang kaso it nasambitan nga masakit sa nasyon.
Suno kay Dr. Peter Myron Torres, sangka gastroenterologist nga ro kanser sa atay hay ro pagbahoe ag pagkalhit it mga bukon it matimsog nga selula sa atay.
Ro kanser nga naga-umpisa sa atay ay ginatawag nga nagapangunang kanser sa atay.
Samtang ro kanser nga nagakalhit sa atay maghalin sa ibang organ hay ginatawag nga metastatic liver cancer.
Ro Hepatocellular carcinoma (HCC) ro ginakabig nga nagapangunang kanser sa atay.
Nasayuran nga indi mabuhi ro sangka tawo kung owa it atay.
Maabo rayang mga importanteng ginahimo sa sueod it kaeawasan.
Agud nga malikawan ro pagkasamad it atay dapat nga ubrahon ro mga masunod; regular nga magpatan-aw sa doktor nga eksperto sa sakit sa atay, istoryahon ro imong doktor angot sa paglikaw sa viral hepatitis kaibahan ro pagpabakuna sa hepatitis A ag hepatitis B.
Kung may una eun nga cirrhosis ukon grabeng sakit sa atay, sundon ro mga rekomendasyon it doktor para sa pagpabueong ag regular nga magpa-screen para sa cancer sa atay.
Kung ikaw hay may sobra nga bug-at ukon matambok , may diabetes, mas manami nga magpakonsulta eagi sa doktor.
