KALIBO, Aklan—Posibleng magpangatubang sa mabug-at nga sanctions ro Russia sa oras nga padayunon kara ro plano nga pag-atake sa Ukraine.
Raya hay sa atubang it nagapadayun nga tensyon sa tunga it daywang nasyon.
Suno kay Atty. Plaridel Morania, sangka batikan nga abogado sa Aklan nga sambilog ro Ukraine sa mga nasyon nga maabu nga resources ag highly cultured nga mga tawo rason nga gusto raya makaron nga i-recover it Russia.
Matueopangdan nga dati eon nga ginsakop it Russia ro Ukraine sa sueod it pilang dag-on apang ko ulihi hay nahimo kara nga maging independent.
May una eon raya makaron nga kaugalingon nga gobyerno ag economic development.
Nasayuran nga plano it Ukraine nga makipag-alyansa sa North Atlantic Treaty Organization (NATO) forces rason nga naakig ro Russia ag nagbutang it masobra 100,000 nga mga soldado sa andang border.
Bangud kara, maabu nga mga gamhanan nga nasyon kapareho it Amerika ro nagpaabot it suporta sa Ukraine kung siin haum sigon sanda nga magtao it dugang nga kagamitan engkaso nga mag-umpisa ro kinagamo.
