KALIBO, Aklan—Ginreklamo sa Bombo Radyo it sangka engineer si Barangay Kapitan Babylina Pelayo it Brgy. Talon, Altavas bangud sa kakueangan it nagakaigo nga aksiyon sa mga ginadangop nga reklamo sa andang barangay.
Suno kay Engr. Odonnel Radislao nga masobra sang dag-on eun ro nagtaliwan matapos nga nagpaeapit imaw kay Kapitana Pelayo agud ipasukat ro anang ginbakae nga eugta nga naahamtang sa nasambitan nga lugar ag may kaeaparon nga 5 hektarya.
Apang eubos sigon ro anang pagkadismaya bangud masami nga nagapatunga si Kapitana Pelayo sa kada gusto nana nga ipasukat ro anang eugta sa kagustuhan man nga masayuran ro tamang sukat ag ro doeonan it anang propiyedad.
Gin-insister pa ni Engr. Radislao nga kompleto ro anang mga dokumento nga magapamatuod sa ro nasambitan nga eugta hay anang ginapag-iyahan.
Ro problema eamang sigon hay mas ginataw-an it pabor ni Kapitan Pelayo ro mga naga-ako man nga sanda ro tag-iya it nasambitan nga eugta.
Dugang pa kara nga bukon it tama nga boe-an imaw it kinamatarong sa anang propiyedad apisar nga imaw hay bukon it residente it nasambitan nga lugar.
Sa pihak nga parte, ginklaro man ni Barangay Kapitan Babylina Pelayo it Brgy. Talon, Altavas nga anang ginhimo ro tanan agud nga mapatung-an ro isyu sa eugta nga ginareklamo ni Engr. Radislao.
Suno kay Kapitana Pelayo nga owa imaw nagpamalibad nga masukat ro nasambitan nga eugta ag sa kamatuoran pa sigon hay gin-aprubahan nana ro sueat ni Engr. Radislao nga naga-request nga anang igapasukat ro anang ginbakae nga eugta.
Apang ro problema eamang suno pa kana hay nagapamaeabag ro mga tag-iya it kaiping man nga eugta partikular eun ro pamilya De Pedro bangud nakaibahan sigon ro andang eugta sa ginpasukat ni Engr. Radislao.
Bilang barangay Kapitan, ro anang papel eamang sigon hay ro pagpatunga agud nga masolbar ro isyu apang owa imaw it mahimo kung may mga nagapamaeabag sa nasambitan nga hilimuon.
