KALIBO, Aklan—Ginbuoe it Commission on Elections (Comelec) ro pagkabaeaka it publiko nga ro election technology system it Smartmatic hay posibleng maka-kompromiso sa resulta it botohan sa Mayo 9, 2022.
Sa sangka pakikipag-angot, ginpahayag ni Comelec spokesperson James Jimenez nga ro relasyon it poll body sa Smartmatic, eabi eon it andang system hay bilang supplier eamang.
Nagatao eamang sigon sanda it makina nga pagagamiton sa eleksyon apang bukon it buot hambaeon kara nga sanda eon ro nagapadaeagan it eleksyon sa nasyon.
Raya ro naging pagklaro ni Jimenez matapos nga iphayag it Cybercrime Investigation and Coordinating Center nga nakompromiso ro system it Smartmatic.
Apisar nga nagapati ro CICC nga owa man it natabo nga hacking sa servers it poll body, ginpahayag it executive director kara nga si Cezar Mancao II nga nakitaan nanda it indikasyon nga ro system it Smartmatic hay na-breach.
Matueopangdan nga ro Smartmatic ro nakabuoe it P402-million contract para magtao it software nga pagagamiton para sa May 2022 automated elections.
