KALIBO, Aklan—Nagapabilin sa Alert level 2 ro bilog nga probinsya it Aklan.
Raya hay maskin nga amat-amat eon nga naganaba ro aktibong kaso it covid-19 sa bilog nga probinsya.
Nasayuran nga sa pinakaulihing datos nga ginpaguwa it Aklan Provincial Epidemiology Surveillance Unit it Provincial Health Office, kapin eon lang sa 137 ro mga aktibong kaso it deadly virus nga presenteng ginamonitor it ahensya.
Raya hay matapos nga pito eon lang ro nailistang nagpositibo sa nasambit nga masakit nga ginakaeakipan it tig-sambilog maghalin sa banwa it Batan, Ibajay, Kalibo, Nabas, New Washington ag daywa sa Numancia.
Sa makaron, ro probinsya it Aklan hay nakalista eon it kabilugang 15,120 nga kaso it covid-19.
Apang, 14,626 eon man ro nakarekober ag 357 ro mga binawian it hueam nga kinabuhi halin kat nag-eopok ro pandemya.
Samtang sa pihak nga parte, nagapadayon man ro bakunahan ag pagturok it booster shot sa mga pumueoyo kontra sa nasambit nga deadly virus agud nga ro tanan hay maging eowas nga matapnan it masakit.
Nag-umpisa eon man ro vaccination roll out sa mga onga nga naga-edad it lima hasta onse anyos kon siin nagapanawagan ro gobyerno ag mga health authorities sa mga ginikanan nga pabakunahan ro andang mga inonga.
