BALITANG Espesyal — Sangka nabdos nga ginang sa Pakistan ro nakumbinsi it peke nga faith healer nga magpabutang ukon magpa-eubong it eansang sa ueo para makasigurado nga magiging eaeaki ro anang gina-nabdos nga eapsag.
Nakibot ro mga doktor sa Lady Reading Hospital sa Peshawar, Pakistan matapos makita nga may naka-eubong nga daywang pulgadang eansag sa ueo it nabdos nga gindaea sa andang ospital .
Ika-ap-at nga pagnabdos eon raya it ginang ag desperado imaw nga makaangkon it unga nga eaeaki bangud nga ginpaandaman imaw it anang mister nga kon babaye eon man ro anang iga-unga nga eapsag, paga-aywan nana raya.
Sa kahadlok nga aywan it asawa, nag-agto imaw sa sangka faith healer nga rekomendado it kaeapitbaeay.
Nagpasugot eagi imaw sa suhestiyon it faith healer nga ipaidaeum imaw sa sangka ritwal kun sa siin iga-eubong ro eansang sa anang ueo agud nga maging eaeaki ro anang gina nabdos .
Owa naka-abot sa utok ro eansang rason nga eowas sa komplikasyon ro ginang ag ro anang gina-nabdos .
Nagkalhit sa social media ro x-ray it ginang nga insigidang ginkabaeak-an it mga awtoridad sa Pakistan.
Sa makaron, ginatugis eon it mga pulis ro faith healer agud nga pasabton sa anang nahimo.
