KALIBO, Aklan—Gin-aprubahan sa ikaywang pagbasa it Sangguniang Panlalawigan it Aklan ro Committee Report No. 2022-045 nga tuyo nga amyendahan ro Tax Ordinance No. 2021-003 para paeawigon ro deadline sa pagbayad it Real Property Tax sa bilog nga probinsya it Aklan halin Marso 31 hasta Hunyo 30, 2022.
Raya hay para mataw-an it kahigayunan ro hinyu it tanan nga mga municipal treasurer sa bilog nga probinsya nga indi pagpasakaan it interest, surcharges ag penalidad ro mga tax payer halin 2018 hasta 2021.
Nauna eon raya nga gintalakay it Committee on Appropriation, Budget and Finance ag Ways and Means ko Pebrero 15.
Tuyo sigon kara nga mataw-an it bastante nga tyempo ro mga tax payer nga makabayad it andang buwis.
Natueopangdan man sigon nanda nga amat-amat paeang nga nagabangon ro mga pumueoyo halin sa epekto it pandemya.
Ginasugid nga nakaangkon it pagtaas sa collection it Real Property Tax ko Enero 2022 nga naga-abot sa P9.4 million kung igakumpara sa parehong period ko nagtaliwan nga dag-on nga nag-abot eamang sa P5.3 million.
