KALIBO, Aklan—Posibleng magpangatubang sa kasong pag-eabag sa Republic Act 10591 ukon Comprehensive Firearms and Ammunition Regulation Act ag Comelec resolution 10728 ro sangka eaeaki kasunod it ginpatigayun nga buy bust operation it mga otoridad sa Brgy. Andagao, Kalibo.
Raya hay matapos nga ma-recover sa posisyon ag kontrol it suspek nga si Jessie Luciano, 50-anyos it Mercedez Village, Brgy. New Buswang, Kalibo ro P20,000 nga marked money ag ro ginabaligya kara nga sangka caliber 45 nga baril, sangka empty magazine, limang ka mga live ammunition, holster it baril ag cellphone.
Depensa ni Luciano nga ginpilit eamang imaw ni certain “Jonard” nga tag-ana it ginatrabahuhan kara nga resto bar nga mag-adto sa lugar kung siin ginkasa ro operasyon it mga operatiba.
Suno kana, sangka seaman ro ginaeauman kara nga buyer it anang baril rason nga nagtao imaw it kumpiyansa.
Mabahoe ro pagpati it suspek nga gin-setup imaw para madakpan it mga otoridad.
Gin-aku man ni Luciano nga ginapanag-iyahan kara ro armas nga anang ginbakae sa bahin it Cebu.
Dugang pa kara nga sigidas eon ro anang pagdispose sa anang mga kagamitan kapareho it motorsiklo ag saeakyan bangud kinahang-ean nana ro kwarta sa pag-adtu it Amerika.
Nakataeana sigon imaw nga mag-apas sa anang mga ginikanan bangud naga-isaeahanon eamang imaw nga nagapangabuhi sa probinsya it Aklan.
Si Luciano hay General Manager ag part time DJ it sangka resto bar sa banwa it Kalibo.
Sa makaron nagapadayun pa ro imbestigasyon it Kalibo Municipal Police Station angot sa insidente.
