KALIBO, Aklan—Ginklaro it Commission on Elections (Comelec) nga kinahang-ean nga padayun nga sundon it mga kandidato sa nagahilapit nga national and local elections ro mga guidelines nga nakabaehag sa Comelec Resolution No. 10732.
Suno kay Atty. Wilfred Jay Balisado, Director it Comelec-6 nga apisar nga ginpaidaeom eon sa new normal status ro pilang ka mga lugar sa nasyon nagapabilin gihapon ro mga campaign guidelines sa nasambit nga resolution.
Ginpadumdum man kara ro mga political aspirants, supporters ag mga campaign organizer nga maging responsable ag padayun nga magsunod sa minimum health protocols agud nga mapabilin nga euwas ro kada isaea sa paeag it pandemya.
Samtang, posible sigon nga pasakaan it nagakaigo nga penalidad it komisyon ro mga kandidato nga mag-eabag sa polisiya angot sa pagpangampanya.
Nasayuran nga ro tanan nga election-related activities sa tyempo it kampanya hay una sa hurisdiksyon it Comelec.
Sa makaron padayun gihapon nga ginabawaean ro mga physical contacts partikular ro paghakus, pagharo, pakikipag-selfie ag maabu nga iba pa.
Ro mga kandidato sa national elections hay may 90 diyas nga magpangampanya umpisa Pebrero 8 hasta Mayo 7.
Samtang, ro mga local electionists man hay ginataw-an it 45 diyas umpisa Marso 25 hasta Mayo 7, 2022.
