KALIBO, Aklan—Nakadepende sa Committee on Transportation it Sangguniang Bayan it Kalibo ro pag-apruba sa rekomendasyon it mga nagkaeain-eain nga tricycle operators and drivers association ro magiging panueuktan sa pamasahe.
Suno kay Punong Barangay Niel Candelario it Poblacion, Kalibo nga sa ginpatigayon nga emergency meeting ko nagtaliwan nga domingo, ginahirit sigon it mga tricycle drivers and operators nga ipabilin sa napueong piso ro pamasahe sa sueod it barangay poblacion ag dugang nga limang piso ukon 15 pesos pag-eampas sa boundaries kara.
Nauna eon nga ginpahayag it Kalibo Poblacion Tricycle Operators Drivers Association ukon KAPOTODA nga mas pabor sanda nga amyendahan ro ginapatuman nga Municipal Ordinance No. 2022-055, ag sundon ro dating Municipal Ordinance No. 2020-019.
Raya hay sa atubang it sunud-sunod nga pagtaas it presyo it produktong petrolyo.
Sa ginahirit nga pamasahe, magatau it daywang piso nga discount sa senior citizens , PWDs ag estudyante.
Samtang, nagaeaum si barangay captain candelario nga maging paborabli sa mga commuters ag drivers/operators ro pinal nga desisyon.
Samtang, gindugang pa ni kapitan Niel nga owa it anuman nga pagbag-o sa sueundanan nga ginpaguwa it provincial inter-agency task force matapos nga extended ro pagpaidaeum sa Aklan sa alert level 1 ukon new normal status.
Sa pihak kara, hugut nana nga ginpadumdum nga magsunod gihapon sa health and safety protocol eabi eon ro pagsuksok it face mask ag physical distancing.
