KALIBO, Aklan—Naging negatibo ro resulta it ginpatigayon nga surprise inspection ag random drug testing sa mga inmates sa parehong male ag female dormitory it Bureau of Jail Management and Penology ukon BJMP-Aklan ko Marso 17, 2022.
Suno kay Jail Inspector Rollyn Malolos, warden it BJMP-Aklan nga ginpangunahan it mga tawuhan it Philippine Drug Enforcement Agency ukon PDEA-Aklan ag Philippine National Police ro pag-inspeksyon sa nasambit nga jail facility ag sa mayad nga swerte owa it anuman nga nakita nga illegal drugs ag iba pang kontrabando sa mga selda.
Pagkatapos it paghaeughog sa lugar, 28 nga eaeaki ag pitong babaye nga Persons Deprived of Liberty ukon PDL ro ginpaidaeum sa drug testing ag puro tanan nag-negatibo.
Nasayuran nga majority sa mga PDLs sa BJMP hay nagapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002.
Random sanda nga ginpili it mga taga-PDEA ag PNP agud nga magpaidaeum sa urine sample testing.
Ro nasambit nga operasyon hay inisyatibo sigon it anang taeatapan base man sa direktiba kanda it higher headquarters agud nga mapabilin ro pasilidad nga drug free.
Samtang, kaibahan sigon ro drug test sa annual medical it andang mga personnel rason nga owa eon sanda gin-eakot.
Sa pihak nga parte, gindugang pa ni Jail Inspector Malolos nga madali eon lang nanda nga igapatuman ro non-contact visitation.
Sa pihak kara, maid-id gihapon suno kana ro andang pag-inspection sa mga ginapadaea nga pagkaon sa mga inmates halin sa andang mga pamilya sa sueod it pasilidad.
