KALIBO, Aklan—Ginbawian it hueam nga kinabuhi samtang ginabueong sa ospital ro sangka motorista matapos nga sumunggab sa tricycle sa national highway nga sakop it banwa it Altavas.
Ginkilaea ro motorcycle driver nga si Petermart Azarcon, sa legal nga edad ag residente it banwa it Sigma, Capiz.
Samtang, ninahan man ro driver it tricycle nga ginkilaeang si George Igos Bautista, 61-anyos ag residente it nasambit nga lugar matapos nga bumaliskad ro anang behikulo tuga it mabaskog nga impact it pagkasunggab kana.
Ginasugid nga maliko kunta sa pihak nga karsada ro driver apang gulpi eamang nga sumunggab ro motorsiklo nga nagresulta man sa pagbaliskad kara ag sumunggab pa sa nakaparada nga jeep sa binit it karsada.
Si Bautista hay presenteng ginabueong sa Altavas district hospital.
Samtang, ro insidente hay padayon pang ginaimbestigahan it Altavas police station para sa nagakaigong disposisyon.
