KALIBO, Aklan–Napasa-alima eon it pilang transport cooperative sa probinsya it Aklan ro andang P6,500 nga fuel subsidy halin sa Land Transportation Franchising and Regulatory Board (LTFRB) ag Department of Transportation (DOTr).
Apang, bukon it tanan nga una sa transport sector hay nakabaton bangud may pila sa mga raya nga nakaangkon it violation rason nga owa naeakip sa Pantawid Pasada Program (PPP).
Suno kay Edgar Igcasenza, Chairman it Malinao-Lezo Transport Cooperative nga kabuhay eon nga ginapatuman it natungdan nga ahensya it gobyerno ro PPP.
Apisar nga nagpagguwa eon it regulasyon ro LTFRB ag DOTr, indi gihapon malikawan nga may pilang franchise stakeholder nga nagapamintaha rason para makaangkon it violation.
Ro kwarta sigon nga gina-download sa tagsa ka mga ATM cards hay dapat nga gamiton eamang para sa pagpatayon it gasolina sa accredited gasoline station ag hugut nga ginabawae ro cash withdrawal.
Ginpabugae pa ni Igcasenza nga striktong ginasunod it anang mga miyembro ro polisiya rason nga sanda tanan hay nakabaton it ayuda.
Nasayuran nga nagpagguwa ro gobyerno it P2.5 billion nga pondo para sa fuel subsidy sa transport sector sa tunga it nagatinaas nga presyo it produktong petrolyo.
