Owa pa it ginapaguwa nga resolution ro Commission on Elections (Comelec) kun ano ro igaplastar nga penalidad sa mga owa nagtambong sa ginpatigayon nga debate ko nagtaliwan nga domingo.
Ro debate hay gin-organisa it Comelec sa mga magapadaeagan nga presidente ag bise presidente.
Ro pagpapanaog it penalidad hay ginpahayag ni Comelec Chairman Saidamen Pangarungan matapos hambaeon ni vice presidential candidate Walden Bello nga dapat nga pinahan it mabug-at ro mga kandidatong sanday Bongbong Marcos ag Sara Duterte-Carpio bangud sa owa pagtambong sa debate.
Suno kay Pangarungan, ro mga kandidatong owa naga-participate hay posibleng boe-an it airtime sa Comelec e-campaign.
Mag-eowas kara, ginhambae pa it Comelec chairman nga ro debates hay voluntary ag indi pwedeng piliton ro kandidato kun owa naila nga magtambong.
Makaangkon it “kamay na bakal” ro Comelec sa mga kandidatong nagpamalibad nga magpasakop sa gin-organisa nanda nga debate.
Dapat sa umpisa pa eang, gintaw-an eon nanda it paandam ro mga kandidato ukon ginpapirma it sangka kasugtanan.
Tutal hay ro Comelec ro pinaka-gamhanan sa makaron nga tiempo, puwede nanda raya nga obrahon.
Tuyo it Comelec nga masayuran ro visions ukon mga paga-obrahon it kandidatong presidente ag bise presidente sa oras nga mabutang sa puwesto.
Importante ro debate agud nga masayuran it publiko ro ikasarang it andang igaboto nga magadumaea sa nasyon.
Mabahoe nga sampae sa comelec ro pag-isnab ni BBM ag sara rason nga indi dapat nga paeampason.
Dapat eamang nga pinahan sanda agud nga indi pagtuearon it iba pang kandidato sa masunod nga debate.
