KALIBO, Aklan–Nagpaadam ro Aklan Police Provincial Office (APPO) sa publiko kontra sa mga serye it paeanakawan makaron nga tyempo it pandemya.
Raya hay kasunod it mga nailistang kaso it panawakan sa pilang kabanwahanan sa probinsya it Aklan.
Suno kay PSSgt. Jane Vega, tagapaghambae it APPO nga dapat maging aktibo ag vigilante ro mga pumueoyo sa tanan nga oras.
Indi sigon dapat magtao it oportunidad sa mga kriminal nga makasueod sa sangka panimaeay ukon establisyemento.
Siguraduhon suno kana nga nakasarado it maayos ro mga purtahan ag bintana agud nga malikawan nga mabiktima it mga manakaw.
Ginlaygayan man kara ro mga pumueoyo eabi eon ro mga may plano nga magbaskyon makaron nga summer season bangud masami nga sa raya nga tyempo ginapatigayun it mga manakaw ro andang maeain nga hilimuon.
Ginpasiguro man ni PSSgt. Vega nga haum sanda nga magresponde sa anumang insidente.
Sa pihak nga parte, padayun man ro pagpadumdom it pulisya sa mga kandidato nga maging responsable ag magsunod sa guidelines it Commission on Elections (Comelec) angot sa pagpangampaniya.
Raya hay matapos nga pormal eon nga nag-umpisa ro campaign period it mga local candidate ko adlaw it Biyernes para sa nagahilapit nga national and local elections.
Ginpahayag ni PSSgt. Vega nga hugut gihapon nga ginabawae sa mga kandidato ro pagsueod sa mga gate it panimaeay para magpakilaea sa mga pumueoyo.
Mag-euwas kara, hugut gihapon nga ginabawae ro pakikipag-lamano, beso-beso, paghakus, pagharu ag pakikipag-selfie sa mga botante.
