KALIBO, Aklan–Kapin sa tunga sa milyong piso ro natigayon nga matakaw it owa pa nakilaea nga mga suspek matapos nga sudlon ro opisina it sangka gasoline station sa barangay Tabayon, Banga kabi-e.
Suno kay Irene Casim, tag-ana it Zuki Gasoline Station nga bandang alas-4:40 kaina it aga-aga kat madiskubre ro insidente ni Vanessa Siba, pump girl it nasambit nga gasolinahan ag residente it barangay Mangan, Banga.
Sa pahayag ni Vanessa-maga report eon kunta imaw sa trabaho kat madiskubrehan nga bukas eon ro pwertahan it andang opisina ag magulo ro sueod kara.
Insigidang gin-report ni Vanessa ro insidente sa tag-ana it gasolinahan ag matapos ro ginpatigayon nga inventory hay natukiban nga naduea ro naga-abot sa tunga sa milyong piso nga balor it kwarta nga nakasueod sa sangka improvised nga vault nga himo sa planchanisa
Insigida sanda nga nagdangop sa banga municipal police station agud nga i-report ro insidente.
Ginpahayag dugang nga sanda it anang sambilog pang katrabaho ro nagabukas it opisina samtang ro nagasarado hay ro andang amo.
Aminado man imaw nga may ginabuytan nga duplicate it yabe.
Narekober sa lugar ro siyaw nga posibleng gingamit sa krimen.
