KALIBO, Aklan–Nagapadayun sa gihapon makarun ro imbestigasyon it Banga PNP sa natabo nga panakawan sa sangka opisina it sangka gasoline station sa barangay Tabayon, Banga ko adlaw it Martes, Marso 29 kun sa siin natigayun nga mabooe it owa sa gihapon makilaea nga suspek ro kapin sa tunga sa milyong piso.
Suno kay PSSgt. Elmar Relente it Banga PNP nga hasta makarun hay owa sa gihapon sanda it may ginakabig nga person of interest sa insidente apang may mga nabooe eun sanda nga impormasyon maghalin sa mga tawo nga maeapit sa lugar.
Bangud kara hay padayun nga nagapanawagan makarun ro Banga PNP sa kung sin-o man ro may nasayuran may kahilabtanan sa insdente nga makipag-angot sa andang taeatapan agud mas mapadali ro andang pagsolbar sa kaso.
Madumduman nga nauna eun nga ginpahayag ni Irene Casim, tag-ana it Zuki Gasoline Station nga nadueaan sanda it haeos tunga sa milyong piso nga balor it kwarta nga nakasueod sa sangka improvised nga vault nga himo sa planchanisa.
Insigida sanda nga nagdangop sa Banga Municipal Police Station agud nga i-report ro insidente.
Nasayuran nga ro mga empleyado it nasambitan nga gasolinahan ro nagabukas it opisina samtang ro nagasarado hay ro andang amo.
Dugang pa kara nga may sambilog sandang dating trabahador nga may buyot pang duplicate it yabe kara.
Narekober man sa lugar ro siyaw nga posibleng gingamit sa krimen.
