KALIBO, Aklan–Kapin sa 26 nga mga eskwelahan sa probinsiya it Aklan ro posibleng madugang sa mga nagapasakop eon sa limited face-to-face classes.
Raya ro ginpahayag ni Dr. Miguel Mac Aposin, Schools Division Superintendent it Department of Education ukon DepEd-Aklan.
Kaibahan ro nasambit nga mga eskwelahan halin sa parehong private ag public schools nga natapos eon nga ipaidaeum sa validation it district ag regional level ag nagahueat eon lang it resulta.
Engkaso nga maaprubahan ro andang aplikasyon, makaibahan ro mga raya sa waeong eskwelahan nga naga-implementar eon it limited in-person classes.
Sa nasambit nga numero it mga nag-apply nga eskwelahan , tatlo sigon sa mga raya hay halin sa private schools.
Base sa andang datos, ro aklan hay may kabilugan nga 378 nga mga eskwelahan sa idaeum it andang hurisdiksyon.
Dugang pa ni Dr Aposin nga maskin amat-amat hay padayun nga nadudugangan ro numero it mga eskwelahan nga ginapanan-aw nga posibleng maeakip sa pagpatigayon it F2F classes.
Ro evaluation suno kana hay base sa ginpaguwa nga guidelines it DepEd kaibahan ro Department of Health (DOH).
Umpisa nga tumama ro COVID-19 pandemic sa Pilipinas, ginapatuman ro distance learning sa haeos tanan nga eskwelahan sa nasyon.
