KALIBO, Aklan–Haeos excited eon ro mga pumueuyu sa Qatar ag maskin ro Filipino community idtu para sa pagahiwatonm nga FIFA world cup.
Suno kay Bombo International Correspondent Jillbert Bachiller Resurreccion it Qatar nga raya ro unang kahigayunan sa kasaysayan nga makatan-aw ro mga pumueuyu it nasambit nga pinakasikat nga football match sa bilog nga kalibutan.
Presente suno kana nga nagapatindog eon it mga stadium ag konstruksyon sa mga highways agud nga malikawan ro paggutok it daeagan it trapiko bangud sa ginaeauman nga pagbuhos it mga fans.
Gindugang pa kara nga maskin sa nobyembre pa ro event hay makita eon makaron pa eamang sa mga business establishments ro mga posters it mga sikat nga football players ag teams.
Nasayuran nga kapin sa 32 nga teams ro magapasakop sa world cup 2022.
May mga teams eon man sigon nga nag-agto sa Qatar agud nga mag-training.
Kaibahan pa sa ginatutukan it mga otoridad hay ro hugut nga pagpatuman it health and safety protocols agud nga malikawan nga maging super spreader ro event.
Angot kara, nagkasugot ro world health organization ukon WHO, FIFA ag Qatar sa mga sueundanan nga igapatuman agud nga maging eowas ro world cup.
Gindugang pa ni Resurreccion nga madasig man nga nakakabangon ro nasambit nga nasyon sa epekto it covid 19 pandemic bangud nga haeos tanan nga mga pumuweuyu hay fully vaccinated ag may booster shot pa.
Unang kahigayunan man sigon sa kasaysayan it World Cup nga ginapatigayon raya sa Winter bangud sa masyadong mainit ro tyempo sa Qatar.
Hunyo ag Hulyo kunta ro tipikal nga tiempo sa pagpatigayon it tournament apang bangud sa haeos 40 degrees celsius ro temperatura sa nasambit nga nasyon sa raya nga tiempo rason nga ginsaylo sa Nobyembre ag Disyembre.
