KALIBO, Aklan–Ginsuhestiyon ni P/Major Willian Aguirre, Head it Intelligence Branch it Aklan Police Provincial Office ukon APPO nga magtipon-tipon ro mga naging biktima it gina-alegar nga scammer nga si Joshua Esmeralda para sa pormal nga pagpasaka it reklamo.
Suno kana nga posibleng kasuhan it Swindling ukon Estafa ro andang ginareklamo bangud sa pagpangloko kanda pinaagi sa pinakamaeapit nga police station.
Pwede suno kana nga magdangop sanda sa NCRPO ukon sa CIDG.
Kinagangean suno kana nga mag-agi sa proseso ro pagpasaka it reklamo.
Dapat sigon nga mag-obra it demand letter sa pagbawi it kwarta nga natigayon nga maitau kay Joshua kaibahan ro mga ebidensiya kapareho it mga resebo.
Sa oras nga mapas-eawan nga makabayad hay pwede eon nga magpasaka it nagakaigo nga kaso.
Samtang, ginlaygay man ni Major Aguirre nga agud nga indi mabiktima it mga scammber hay mag-usisa anay ukon magbackground check sa mga makatransaksyon ag indi anay basta-basta nga magtau it mabahoe nga kantidad.
