KALIBO, Aklan–Owa eon it kabuhi kat masapwan ro sangka 72-anyos nga eaeaki ag miyembro it guardian brotherhood bandang alas-4:00 it aga-aga kahapon sa Lambingan Beach, Brgy. Pook, Kalibo.
Nakilaea ro biktima nga si Lodovico Villaruel, tumandok it banwa it Balete apang presenteng naga-istar sa nasambit nga lugar.
Sa pahayag ni Romy Carillo, tag-ana it payag nga gina istaran it biktima nag-inuman pa sanda kabi-i kaibahan si Isidro Villanueva.
Ginapahayag nga nakibot imaw sa pag-inporma kana ni Villanueva nga owa eon nagaginhawa ro biktima samtang naga-eubog ag nakamuk-eat ro mga mata.
Nagapati si Carillo nga posibleng ginbangungot ro biktima bangud nga owa man raya nakitaan it anumang lastro sa eawas ukon ginabatyag nga baeatian.
Sa makaron, padayun pa ro ginahimo nga imbestigasyon it Kalibo Municipal Police Station para matumod ro naging rason it hinali nga kamatayon it nasambit nga biktima.
