KALIBO, Aklan–Natigayon eon nga maayos it uman ro nasamad nga tulay sa Barangay Rosal, Libacao nga nasamad it nagaragasa nga tubi-baha daea it bagyong Agaton ko nagtaliwan nga adlaw.
Raya ro ginkumpirma ni P/Lt. Richard De Vera it Aklan 1st Mobile Force Company nga naka-assign sa nasambit nga lugar.
Suno kana nga matapos nga masamad ro dit-ana bridge hay insigida nanda nga ginpahisayod raya sa natungdan nga ahensiya it gobyerno butang nga ginsabat man eagi it municipal engineering office it LGU-Libacao.
Apang antes ro pag-ayos it tulay pinaagi sa pagtambak it mga baeas sa ubos sa pundasyon kara, nagbutang sanda it butong nga ginsugpon-sugpon agud nga temporaryong maagihan eabi eon it mga nagagamit it motorsiklo.
Ginasugid nga kaeabanan eon nga nagakasamad ro tulay kada nagataas ro tubi sa suba bangud sa bitin nga pagka-obra kara kun sa siin nagaeaum ro mga residente nga mapukaw ro atensyon it mga taga provincial engineering office ag mapa-deretso hasta sa karsada.
Apektado kada nagakasamad ro tulay ro mga residente it manika, uyang ag dalagsaan sa nasambit nga banwa.
