Ginpasiguro it Department of Agriculture sa publiko nga bastante ro food production it nasyon, partikular it prime agricultural products, kapaeho it bugas, tinuea ag isda.
Raya hay sa pihak it pagtaas it presyo it mga nasambit nga produkto eabi pa ag mataas ro demand sa isda ag tinuea makaron nga Semana Santa.
Suno kay DA Undersecretary Ariel Cayanan, sa kamatuoran hay may una nga record-breaking harvest productions para sa tatlong buean nga buffer stock sa ikaywang quarter ukon hasta sa Hunyo.
Makaangkon pa sigon it produksyon sa masunod nga tatlong buean para sa ikatlong quarter bilang preparasyon sa tag-uean.
Bastante man ukon 150% sufficient ro low-land level vegetables ukon bulanglang vegetables samtang 158% ro sufficiency level it highland vegetables.
Samtang, nag apela si Cayanan nga i-exempt sa spending ban it Comelec ro subsidiya para sa mga mangunguma ag mangingisda.
