KALIBO, Aklan–Nagapadayun ro augmentation it Office of the Provincial Veterinarian (OPVET)-Aklan sa pilang ka mga munisipalidad nga nagapatigayun it mass vaccination kontra sa rabies.
Suno kay Dr. Ronald Lorenzo, Rabies Program Coordinator it OPVET-Aklan nga nagapadaea sanda it technical assistance ukon vaccinator sa mga lokal nga gobyerno nga gustong maghiwat it anti-rabies campaign.
Kaeabanan sigon nga ro LGU ro nagasabat it bakuna bangud nagapabilin nga limitado ro suplay it andang opisina.
Ginpaathag ni Dr. Lorenzo nga naghimo eon sanda it proposal ag nagaeaum nga ma-aprubahan raya para makatao it libreng bakuna sa mga pet owner.
Gin-engganyo pa kara ro mga pet owner nga regular nga pabakunahan kontra sa rabies ro andang alagang ayam ag kuring kamana man nga ibutang sa maayos nga kulungan para masiguro ro andang kaeuwasan.
