KALIBO, Aklan–Kabilugan nga 96.76% ukon 4,119 nga mga kapulisan sa bilog nga Western Visayas ro naka-avail it local absentee voting nga nagtapos ko Biyernes, Abril 29, 2022.
Suno kay PLTCOL Arnel Solis, tagapaghambae it PRO-6 nga sa kabilugan nga 4,257 nga nag-apply, 138 ro owa nakaboto matapos nga idtu ma-assign sa negros occidental.
Kaibahan sigon sa nagboto ro mga matag-as nga opistyal it PRO-6 sa pagpanguna ni Police Brigadier General Flynn Dongbo sa Iloilo Police Provincial Office Headquarters.
Sa pihak nga parte, gindugang pa ni PLTCOL Solis nga samtang nagahilapit ro eleksyon hay mas pa nanda nga ginhugtan ro pagpatuman it Comelec checkpoint.
Bangud kara, nagsaka eon sa 184 ro mga nadakpan nga nag-eabag sa comelec gun ban hasta ko abril 25 nga record.
Nagapanguna sa numero it mga naaresto ro negros occidental nga may 71; kasunod ro Iloilo province nga may 29; aklan nga may 25; Iloilo City nga may 18; Bacolod city nga may 17; capiz nga may 11 ag guimaras nga may pito.
Nakumpiska it PNP sa mga raya ro 104 nga nagkaeain-eain nga armas ag 91 ro bladed weapons.
Samtang, mabahoe man ro andang pagpasaeamat bangud nga hasta sa makaron hay owa pa sanda it may nailistang insidente nga may koneksyon sa eleksyon.
