KALIBO, Aklan—Emosyonal nga nagdangop sa estasyon it Bombo Radyo Kalibo ro sangka ea-eaki para magpangayo it pasensya matapos nga magpost it sangka bomb joke sa social media.
Ro nasambit nga bomb joke hay para sa sangka kandidato nga maga-abot sa Aklan.
Suno kay Haron Castro, tumandok it Madalag, Aklan nga pagkatapos makabaton it pilang ka mga mensahe ag mga negatibong comment sa social media hay pilang gabi-e eon sigon imaw nga owa it tueog sa pagpaminsar sa posibleng kaso nga igapangatubangan nana.
Owa sigon imaw kasayod nga may laye may kaangtanan sa mga bomb threat kung siin owa raya ginseryuso.
Dugang pa ni Castro nga nauna eon imaw nga nagdangop sa Madalag Municipal Police Station para magpangayo it nagakaigo nga eaygay kung alin ro mayad nga ubrahan.
Nagdangop man sigon imaw sa Volunteer Center it kandidato nga gintumod sa anang post para magpangayo it pasensya.
Sa makaron, nasayuran nga deleted eon ro nasambit nga post apang abo ro nakahawid it screenshots ag gingamit raya nga ebidensiya sa pagreport sa Kalibo Municipal Police Station.
