KALIBO, Aklan–Mapatuman eamang it mga natungdan nga employers ro bag-ong umento sa sweldo sa oras nga maging epektibo eon ro wage order.
Raya ro pagklaru ni Department of Labor and Employment ukon DOLE-Aklan OIC Joselito dela Banda.
Raya hay kasunod it pag-apruba it Regional Tripartite Wages and Productivity Board sa petisyon nga pataasan ro sweldo sa bilog nga Western Visayas.
Suno kay Dela Banda nga nakataeana pang iga-review it National Wages and Productivity Commission ro wage increase sa rehiyon antes nga eubusan nga maging pinal.
Ro dugang sa sweldo hay nagahampang sa P55 pesos hasta P110 pesos.
Ro mga empleyado sa mga pribadong establisimento nga may 10 nga trabahador panaba hay sarang makabo-oe it 420 pesos nga sweldo kada adlaw halin sa presenteng P310 pesos.
Samtang, ro mga may empleyado nga masobra sa 10 hay dapat nga makabaton it P450 pesos halin sa P395 pesos kada adlaw.
Ro agricultural workers hay makabo-oe it P410 halin sa P315.
Nasayuran nga ulihing nagpatuman it wage increase sa Western Visayas kato pang Nobyembre 2019.
Pirmado it tanan nga mga RTPWB members ro bag-ong wage orders nga magiging epektibo sa oras nga matapos ro pag-review ag pag-apruba it NWPC kamana man nga ma-publish raya sa mga peryodiko.
Posible suno kana nga makataliwan ro 15 diyas ukon antes ro Hunyo 12 hay mapatuman eon raya.
Ginasugid nga ro orihinal nga ginapangayo nga daily minimum wage it labor sectors hay P750, apang sa ginpatigayon nga konsultasyon sa kada probinsiya, nakahimo it desisyon nga 450 pesos eamang.
Sa pihak nga parte, ginpahayag pa ni dela banda nga ginpasakaan man it RTWPB ro sweldo para sa mga “kasambahay” nga halin sa P4,000 paagto sa P4,500 kada buean.
