KALIBO, Aklan–Gin-engganyo it sangka eksperto ro mga pumueoyo nga regular nga mag-check it andang blood pressure kadungan it selebrasyon it Hypertension Awareness Month makaron nga buean it Mayo.
Suno kay Dr. Michael Vic Beluso, Internist-Cardiologist, importante ro temprano nga pagpabueong agud nga indi mauli sa komplikasyon ro pag-angkon it altapresyon.
Ro hypertension ukon high blood pressure hay sambilog sa mga makamaeatay nga baeatian kung siin naga-abot sa 1 billion nga katawo ro naapektuhan kara sa bilog nga kalibutan.
Nagapangaywa man raya sa rason it pagkamatay sa Pilipinas.
Ginakabig nga “silent killer” ro pag-angkon it high blood pressure bangud bukon it tanan hay naka-eksperyensya it mga sintomas.
Pila sa mga sintomas it altapresyo hay ro pagpaeanakit it tangkugo, pagkahilo, pagbug-at it ueo, pagsuka ag maabu nga iba pa.
Ginpahayag pa ni Dr. Beluso nga owa it ginapili nga edad ag kasarian ro altapresyon.
Pila sa mga posibleng magtuga it nasambit nga kondisyon hay ro sobrang pag-inom it aeak, pagpanigarilyo, owa pag-ehersisyo ag sobra nga pagkaon it maaeat ag matambok.
Samtang, pwede man sigon raya nga mamana sa mga ginikanan.
Ro sakop it normal nga presyon it dugo hay 120/80 apang kung mag-abot eon it 140/90 pataas hay makabig eon raya nga altapresyon ukon high blood pressure.
Engkaso nga mapabay-an, ro pasyente hay posibleng makaangkon it stroke, heart attack, komplikasyon sa kidney, tagipusuon ag iba pa.
